قصة قوم يأجوج ومأجوج.الرحاله المسلم سلام الترجمان

 طبعًا أنتَ عارف كُوّيس مين هُما يأجوج ومأجوج..

وعارف أنهم من العلامات الكُبرى للساعة..

بس الي أنا وأنتَ عارفينه كُويس برضه هو الفضول الي جُوّة كُل واحد فينا لاكتشاف مكانهم..

يأجوج ومأجوج

من هم قوم يأجوج ومأجوج ووصفهم 

ناس من نسل "يافث" بن نوح، يعني بشر زينا، بس شكلهم غريب جدًا، من وجوه كبيرة ولون بشرة أحمر، وأجساد قوية جدًا وضخمة..

كُل ده مُخيف مش مُثير للفضول..

المُثير للفضول هو الحكاية الي اتحكت عنهم وفضلت نهايتها مُعلّقة لنهاية العالم..

يعني قوم جبارين ومُتوحشين وكُل شوية يروحوا يسطوا على القبائل المُجاورة عشان ياخدوا أكلهم ومحاصيلهم السنوية وفي الآخر يرجعوا يعيشوا لوحدهم في الكهوف مُعتمدين على المُؤن الي خزنوها من المُزارعين..

قوم جبارين يعني..

واستخدموا قوتهم في الشر المُطلق..

رحله البحث عن مكان يأجوج ومأجوج

بس أنا مش جايّ أحكي لك حكايتهم هُما، قدر ما جايّ أحكي لك عن رحلة لمعرفة مكانهم..

رحلة بتوضح مدى الشغف الي كان جُوّة الناس من زمان لمعرفة مكانهم برضه..

والموضوع ابتدى من كابوس .. 

كابوس راوّد الخليفة العباسي الواثق بالله.. 

الكابوس فيه سد يأجوج ومأجوج بيتفتح وأشكال مُخيفـة عمّالة تخرُج من وراه.. 

لحد ما انهار السور تمامًا والكيانات المُرعبة دي اجتاحـت العالم..

الكوابيس والأحلام عند الناس القديمة دي كانت لها مكانة خاصة جدًا وكانوا بيعتبروها زيّ اشارات من العالم الماورائي أو الروّحاني..

فالراجل صحّى من النوم مفزوع ومرعوب فبسرعة بعت لواحد من أهم علماء الدولة وقتها، رجل معروف عنه معرفته بالعلوم واللغات اسمه "سلام الترجمان"..

من هو سلام الترجمان

أنتَ بقى متعرفش مين سلام ده يا رفيق..؟

سلام التُرجمان كان قادر على التحدُث وترجمة ما يقرُب من 30 لُغة حية، وكان أصلاً بيشتغل رحالة كمان، الي هو بيسافر من بلد لبلد ويقابل الناس هنا وهناك..

(الواحد كان نفسه يشتغل الشُغلانة دي ويعمل عظمة في الترحال)

المُهم.. 

بعد ساعات بسيطة وصل.. 

سلام كان مستغرب ومخضوُض كده، الي هو خليفة المسلمين باعت له يبقى أكيد في مصيبة يا إما حاجة كبيرة أوي..

الواثق بالله استقبل سلام الترجمان استقبال الأبطال فراح منه الخوف شوية ولكن لسـه باين عليـه القلق والتوتر ..

ولما شاف سـلام هـديِ شوية.. 

فضايفـه، وقرر يبدأ يحكي له عن الكابوس المُزعج الي شافـه، وسلام مستغرب جدًا من الي بيـحصل .. 

الواثق بالله حكى له عن سد يأجوج ومأجوج والي شافه في الكابوس..

عشان يُفاجئ سلام ويقوله.. بُص أنا مرعوب ومش هعرف أنام إلا لما تروح تشوف السد ده بـنفسك وتشوف اتفتح فعلاً ولا لأ..؟

فَـسلام قاله.. يا مولايّ وأنا هعرف مكان السد ده منين..؟ 

فرد عليـه.. أنا هجهز لك حملة ضخمة بالرجال والمؤن والعتاد والأموال وكافة شيء وكل الي عليك دلوقتي إنك تروح الأماكن المقصودة ومن هناك تسأل أهل البلاد والمناطق دي عن السد وشوية بشوية هيدلوك.. 

خُد بالك إن دي هتكون من أعجب الرحلات في التاريخ واحنا دلوقتي واقفين شايفينها قدامنا بيتخطط لها.. 

سلام دلوقتي بقّى في مأزق.. 

هيستعين بأدلة من الي بيكونوا عارفين بواطن الجبال والمناطق الخالية الي محدش يعرف عنها حاجة.. 

سلام مكنش قدامه غير إنه يقول.. حاضر.

بُص..

سلام كان جُوَّاه شايف إن دي رحلة هَتُخلد اسمه وذكره في التاريخ لأنه لو قدر فعلاً يحقق المُراد هيكون ده شيء ملحمي في تاريخ البشرية كلها.. 

ومن ناحية تانية ده الخليفة وكيفه كده.. 

الواثق بالله بعت معاه ٦٠ راجل قوي جدًا من الجيش العباسي وزودهم كلهم بالمؤن والسلاح والعتاد والأموال كل واحد على حدة.. 

وبدأت الرحلة من مقر الدولة العباسية في بغداد لأول محطة في رحلته .. 

ركز معايا قي اللفة دي..

أول حاجة كأن قدامك ال Gps والسهم بيتحرك بقى قدامك.. 

أول حاجة راحوا لحاكم أرمينية وسلموه خطاب من الواثق بالله مكتوب فيه إنه يساعدهم ويزودهم بالأدلة الي محتاجينها وبالفعل حاكم أرمينية عمل كده وكمان كتب لهم خطاب تاني لحاكم إقليم السرير ومن هناك وصولا إقليم اللان ومنه كتب لهم لملك الخزر في إقليم بحر قزوين.. 

يعني كانوا كل ما يروحوا مكان حاكم المكان ده يكتب لهم خطاب توصية للمكان الي بعده ويزودهم بشخص يكون دليل لهم لحد ما في الاخر وصلوا مكان غريب كده.. 

بعد ٢٥ يوم مشيّ ورا الأدلة وصل سلام ورجالته لأرض لونها أسود، يعني رملتها سوداء وريحتها نتنة الي هوه مكنوش قادرين يشموها حتى.. 

فمشوا ناحية اليمين ومشيوا مسيرة عشرة أيام فلقوا نفسهم عند منطقة كده كلها بيوت متدمرة، يعني مدينة خربانة خالص، فسلام الترجمان سأل الأدلة الي معاه.. 

ايه المدينة الخربانة دي..؟ 

قالوا له .. دي واحدة من المُدن الي كان خربها يأجوج ومأجوج زمان.. 

هنا يمكن يكون المقصود مش بيوت مهدودة قدر ما يكون المقصود، مكان فيه زيّ الي إحنا بنسميها آثار دي ومتكسرة مثلاً.. 

فعبروا من خلالها كده وفجأة بعد مسيرة ٢٠ يوم عشان يوصل مجموع المسيرة لو مركز معايا كام يوم..؟ 

٥٥يوم يا رفيق .. لأ ركز معايا.. 

المُهم وصلوا عند سلسلة جبال كده شبه الحصون الضخمة القديمة لقوا فيها ناس مسلمين بيتكلموا لغة ملغبطة كده، لأنهم تقريباً من أهل فارس بس دخلوا الاسلام فبقوا يتكلموا فارسي على عربي..

سابوهم ومشيوا بعد ما شاف سلام ورجالته الناس دي ماسكة مصاحف وبتقرأ منها يعني المصحف واصل لهم.. 

مشوا مسيرة تانية بعد المدينة دي لحد ما وصلوا عند مدينة بقى إسمها ايه..؟ 

ما إسم المدينه التي نزل بها ذو القرنين

الأيكة ودي مدينة مُحصنة كده عليها باب حديد ولما سألوا الأدلة قالوا لهم إن دي المدينة الي نزل فيها ذو القرنين وجيشه وإن السد خلاص على مسيرة ٣ أيام من هنا..

المُهم إن سلام بعد ٣ أيام وصل عند جبلين كده بينهم سد عظيم!. 

الراجل اتصدم وأصابته رعشة في جسده كده على حد وصفه، أول ما شاف السد مبقاش عارف يعمل ايه ففضل يفحص فيه ويبص عليه من قريب مُنبهر ..

بيقولك إن الجبلين دول بينهم أصلاً طريق طريق عرضه ١٥٠ متر في آخره سد من الحديد والنحاس ..

بُص ركز معايا هنا..

بيقولك جبلين وبينهم طريق ..

يعني تخيل نفسك معايا كده انت بين جبلين ماشي في الطريق الي بينهم..

الطريق ده محاوطك فيهم الجبلين من كل حتة بس الطريق ده ذات نفسه عرضه ١٥٠ متر هتمشي فيه لحد ما توصل لسد هو ده آخر الطريق ..

بيقولك سلام إن السد ده مبني بطريقة مُذهلة متخليش خُرم الإبرة ينفذ ويعدي.. مُتخيل..؟ 

لأ أنت مش مُتخيل ..

بُص سلام بيقولك ايه..

وصف السد الذي حبس وراءه يأجوج ومأجوج

السد ده كان عبارة عن دلفتين كل دلفة خمسة وعشرين ذراع، ارتفاع كل دلفة خمسين ذراع وفوق كل دلفة عتبة عليا طول كل واحدة مائة وعشرين ذراع..

وفوق كل واحدة من العتب ده في بنيان مُتصل لحد رأس الجبل فوق وعلى مرمى وارتفاع مدى البصر .

على كل دلفة من دول قرنان متنين من عند الأطراف كده مش قرون مُستدبة .. 

على الباب قفل طوله سبعة أذرع ... 

تحت الباب في عتبه طولها ٩٠ ذراع تقريباً ومكتوب عليها.. 

" فإذا جاء وعد ربي جعله دكاء وكان وعد ربي حقاً" .

أنا عايز اقولك إني استاهل جايزة على إني ترجمت كلام الإدريسي في الحتة دي ..

الفظيع بقى ..

إن سلام بيقولك إن في المنطقة دي وجنب السد ده في حصنين كده زيّ ورشة يعني، كل واحدة فيهم فيها الأدوات الي تم تصنيع الصرح الفظيع ده بيهم ورئيس الحصن ده بيعدي كل ٣ أو ٤ أيام يضرب على السد كده عشان يأجوج ومأجوج يسمعوا إن في بشر يعني برة السد عارفين الموضوع ومؤمنين بالله وإن لسه ميعاد خروجهم بدري عليه ..

المُهم إن سلام كان موهوم بقى فراح سأل الناس الي معاه وأهل المنطقة إذا كانوا شافوا حد حاول يخرج من وراء السد ده قبل كده..؟ 

قالوا له إنهم شافوا قبل كده مجموعة منهم قبل كده حاولوا يخرجوا فعلاً لكن ريح سوداء جات ودفعتهم جوة مرة تانية ..

سلام الترجمان كتب تقريره على الواقع ورسم خريطة للمكان واحتفظ بذكرياته وسجلها لنا عشان أحكيهالك أنا دلوقتي وانتهت رحلته على كده..

وبدأ يرجع هو والرجالة لبغداد وبعد غياب ٢٨ شهر على حد كلام سلام عانى فيه من فقدان ٤٦ رجل من الي كانوا طالعين معاه نتيجة للتعب والارهاق ..

وانتهت كده واحدة من أعجب عجائب قصص الرحالة المسلمين على الإطلاق..

لكن السؤال الي بيطرح نفسه وإن على الرغم من تصديق كتير من العلماء والمؤرخين والمستشرقين وغيرهم وغيرهم للقصة دي وتأكيدهم على صحتها .. 

الرحلة دي تقريباً بتقودنا لدولة قرغيزستان.. 

ولحد دلوقتي محدش برضـه لسه عارف مكان السد وحتى المكان الي بيقول عليه سلام ده يظل محل تساؤل.. 

يبقى هل القصة دي.حقيقية..؟ 

معرفش والله ومش عارف إذا كانت الـخريطـة دي حقيقيـة ولا لأ بس أنا دوري أعرض عليك للمعرفة والعلم مش أكتر..

المُهم إن عقاب ربنا الي نفذه "ذو القرنين" على يأجوج ومأجوج ده كان لُه أسباب لو فكرت فيها..

منهج "يأجوج ومأجوج" في التعايُش من انهم ميشتغلوش ويناموا طول السنة وفي آخرها يروحوا يبلطجوا على الناس الي بتشتغل كان مُمكن يكون منهج لكثير من القبائل زيهم وبعدهم..

كمان القبائل الضعيفة نفسها مش هتشتغل بقى وتقولك اشتغل ليه وأزرع ليه منا كده كده هيتاخد مني محاصيلي..

وأنتَ هنا بتتكلم عن بداية الخلق خالص وقت ما الانسان كان لسه بيتعلم الزراعة..

ده غالبًا كان بيهدد الحياة الانسانية على كوكب الأرض وبيهدد أنه يفنيها تمامًا في بدايتها..

فبعثهم مع نهاية العالم مش عقاب لينا، ولا كان عقاب ليهم..

إنما هو للدلالة على إن منهجهم ده وقوتهم المُفرطة واستخدامها الخاطئ هُما دلالة على نهاية الانسانية الي هُما منها أصلاً..

وبعيدن انا عايز ألفت نظرك لحاجة "أنت مش بتعمل شير ليه..؟" ما تعمل شير!.

والأهم من الشير..؟

اتبسطت ولا لأ..؟ 

يبقى أنا كده عملت عظمة..

في الأخير بجد، بتقدم بالشُكر والامتنان لكُل من اهتم بالمُحتوى المُقدم وقدم لهُ الدعم، خالص الشُكر لكم يا رفاق، كلامكم حفزني مُؤخرًا جدًا..

#مصطفى_بيعمل_عظمة

#مصطفى_محمود