من هم أصحاب السبت وكيف وصفهم القرآن الكريم .غذي عقلك

مع كُل جدل بيحصل بين الناس حول قضيةً ما..

لازم تفهم إن بيتم تصنيفهم لتلات فئات..

ملهوُمش رابع..

بس إزايّ..؟

بُص يا رفيق الموضوُع من الأول..

كم مكث اصحاب السبت في الأرض وهل لهم ذريه

لازم تعرف إن القصة مُتعلقة ببني اسرائيل مش قوم تاني..

وهي حصلت لجماعة من جماعات بني اسرائيل أثناء فترة اقامتهم في كنعان وده بيعني إنها فترة ما بعد نجاح سيدنا يوشع بن نون في غزو كنعان..

يعني فترة ما بعد خروجهم من مصر مع سيدنا موسى ووفاته ودخولهم لكنعان مرة تانية..

المُهم قبل ما أدخل بيك في التفاصيل واحكي لك الحدوتة لازم أفهمك الدنيا كانت ماشية إزايّ..؟

زيّ ما قولت لك قبل كده، بني اسرائيل وقتها كانوا 12 قبيلة وبنقول عليهم الأسباط وكل قبيلة من دول سكنت قرية أو اكتر في كنعان..

أما قصة أصحاب السبت دي حصلت لأي سبط وفي أي زمان وأي مكان..

بُص احنا مش عارفين بس الي نعرفه ان الاحداث كانت في منطقة ساحلية والأهالي كانوا شغالين في الصيد..

والي حصل إن الأمر الإلهي نزل بتحريم الصيد وكافة الأعمال يتم تعليقها يوم السبت..

بحيث يتفرغوا في اليوم ده للعبادة وبس..

الموضوع سهل وبسيط أهو..

عدد سكان القرية دي تعدى المائة ألف نسمة..

وفي فترة من الفترات أصابت القرية دي مصاب عظيم ومُمكن نعتبره ابتلاء من الله عز وجل..

في الفترة دي ومع اعتماد أهل القرية دي على الصيد كحرفة أساسية..

حصلت حاجة مش مُتوّقعة، البحر بقى ينضُب طول الأسبوع من السمك ما عدا يوم السبت بس، الأهالي في يوم العبادة كانوا بيلاحظوا إن السمك موجود في البحر..

 السمك كان بيكون واضح للعيان في وسط المياة بكل وضوح..

ومش قادرين يقربوا منه أو يصطادوه..

يجربوا الأسبوع الي وراه مفيش حاجة برضه، وفضل الحال زيّ ما هو يادوبك طول الأسبوع مش لاقيين يأكلوا إلا الي يسد جُوعهم..

سعر السمك في الأسواق زاد جدًا وكان هو الوجبة الرئيسية..

بس بعض الصيادين شافوا انهم لو صبروا على الموضوع ده هيُصيبهم الجوع بعد فترة بسيطة..

 فقررت مجموعة منهم أنهم يعملوا "حيلة" كده على الأمر الإلهي ده..

فبدأو ينصبوا الشباك من يوم الجمعة بليل كده في المياة بحيث إن السمك يُقع في الشباك يوم السبت وهما مُتفرغين للعبادة ومش بيقربوا للبحر..

الفكرة هنا يا رفيق وركز معايا كويس عشان تستخلص العبرة..

 في أمر الهي بيحرّم ويجرّم العمل في يوم السبت، فليه مثلاً أنا متحايلش على الأمر الإلهي ده وكأنه قانون بشري وضعي..

 فالحيلة دي عملت فتنة بين الناس وانقسموا ل3 فرق..

 فرقة هي الي قررت الفكرة ومعاهم الي وافقوهم عليها وشافوا إن ده ذكاء ومش حرام ومفيش حاجة..

فرقة تانية وقفت على الحياد الي هو لا رفضت ولا منعت..

فرقة تالتة رفضت الموضوع ده رفضًا قطعيًا..

 ودارت الأمور..

 وبعد مُناقشات مُطوّلة واجتماعات ما بين الأهالي واستشارات كتيرة للكهنة من سبط لاوي..

 باءت النتيجة بإن الفرقة التالتة دي والي رفضت الموضوع رفضًا بينًا يقرروا أنهم يبنوا بينهم وبين الفرقتين التانيين زيّ جدار عالي كده..

جدار يفصل ما بينهم وما بين الفرقتين التانيين بحيث إن التحريم ما يوصلهومش..

خُد بالك من حاجة..

 

الفرقة الأولى دي مش بس ممتنعوش عن الطاعة.. لأ وهقولك ليه لأ..؟

كيف وصف القرآن أصحاب السبت

لما القرآن وصفهم هنا وصفهم بالمُعتدين..

ليه بقى مُعتدين..؟

لأنهم ببساطة تعدوا، وتعدوا دي بتتقال لما بتتجاوز حدودك، يقولك أنت تجاوزت حدودك يعني اعتديت عليا أو على حاجة تُخصني..

هنا الاعتداء كان على أمر إلهي، لأن الي عمل ده مرفضش الأمر أو قرر ميعملوش والسلام..

لأ، ده تحايل عليه وفي التحايُل إهانة، وإنك تُهين أمر إلهي ده يبقى أكبر اعتداء..

عشان كده نكمل بقى ونشوف ايع عقوبة المُعتدين..

الي حصل كان مُرعب يا رفيق..

الأمور مشيت عادي، والأيام مشيت ومفيش جديد حصل، كل يوم سبت تثنصب المصائد والشباك تترمي في البحر والسمك يقع فريسة للفئة المُعتدية دي..

والفرقة التانية بتتفرج على الحال عادي جدًا..

والفرقة التالتة ثابتة على الرغم من ثبات الأيام دون عقاب..

لحد ما كان اليوم الموعود..

في يوم من الأيام صحي أهل الفرقة التالتة الي رفضت العدوان ده وحسّوا بحاجة غريبة أو بالأحرى محسّوش بالمُعتاد..

مفيش صوت في الناحية التانية من الجدار..

مفيش صوت خالص وكأن أهل الجانب المُضاد من الجدار ده هلكوا مثلاً أو اختفوا ..

هنا بدأ يساوّرهم القلق..

الجدار الفاصل ده كان فيه زيّ باب بسلالم كده وقف الأهالي عنده يحاولوا يسمعوا الجانب التاني لكن مفيش صوت..

مفيش حاجة خالص..

الشمس حامية جدًا ومفيش غير صوت البحر، والوضع مُقلِق ومُريب..

لحد ما واحد اقترح إن واحد منهم يفتح الباب ويعدي يشوف في ايه بالجانب التاني من القرية..

وفعلاً..

ماهو عذاب اصحاب السبت هما ذكرها القرآن الكريم

واحد منهم طلع السلم كده وبراحة فتح الباب عشان يُصعّق من هوّل ما رأى..

قردة وخنازير بثياب بشر !.

قرود وخنازير لابسين لبس الأهالي..

بالأحرى...

المُعتدين تحوّلوا لقردة..

مشي وسطهم الصالحين حزانى على مصابهم، ولكن انتهى كل شيء..

القرود دي كان جُوّاهم صُراخ يكفي لنهاية العالم ولا يكفي..

تخيّل تعيش وأنتَ ممسوخ مسخ مُشوّه لأنك تعديت على أمر ربنا، تخيّل جُوّاك العذاب الي أنتَ عايشه واصل لفين..؟

فواحد من الصالحين قالهم.. ألم ننهاكم عن ما كُنتم تفعلون..؟

فيهز القردة رؤوسهم بأيّ نعم..

كم مكث اصحاب السبت في الأرض وهل لهم ذريه

ابن عباس بيقول في الجُزئية دي.. "أن الذين مُسخوا قردة من بني اسرائيل مكثوا في الأرض ثلاثة أيام فقط ومن بعدها ماتوا جميعًا، فإن المسخ لا يعيش ولا يكون له ذُرية..

خُد بالك من نُقطة كمان يا رفيق..

الناس الي سكتت عن الحق اتمسخوا هما كمان، لأنهم مغيروش النهيّ وبسكوتهم ده كان سند للفئة الضالة فقواهم، والله أعلم..

وعاش بني إسرائيل بعدها في كنعان والقصة دي بترّن في ودنهم..

خُد بالك إن على الرغم من رفض المجتمعات العلمية للقصة دي إلا إنهم مش قادرين يثبتوا عدم حدوثها أو إمكانية عدم حدوثها..

المُهم..

دومًا هتلاقي في الأمور الي تُثير الجدل ويقوم عليها خلاف اجتماعي ضخم، فورًا وأنت مغمض هتلاقي ٣ فرق..

فئتين يستحقان المسخ، وفئة صالحة، والأكثرية تكُون للمسوُخ بأيّ زمن، والقلة هي الصالحة..

فلو أنتَ من القلائل الي لسه قادرين يعبروا عن رفضهم للباطل وقادر تتبيّن الحق من الغيّ..

خليك عارف أنك تتمتع بنفس ذات البصيرة الي تمتعت بها الفرقة الناجيّة، عسانا ننجو..

انتهى!.

مصادري في كتابه المقال

القرآن الكريم

البداية والنهايه - ابن كثير

تفسير القرطبي

تفسير الطوبري